CCCLXX.

1486, November 25. Breslau.

Bischöflicher Schied über Kittelau.

Wir Johannes von gots genaden bischoff zu Breslaw etc. bekennen uffintlich mit desem unserm brieffe vor ydermeniglich, das wir clerlich unterricht seyn, dass das gut Kittel zu Nympsch ym lande gelegen, vor langen ioren durch dy kötzer und hertzoge verwuestet vorterbet und nun mit holcze verwachsen ist wurden, also, das es bisher ungebawet ist blebin und uff das, das es weder gebawet, besatzt und gerodet möge werden, haben dy wirdige und erbare woltuchtige her Georgius Freyberg, meyster yn freyen kunsten, techand der thumkirchen czwm heligen Crewtz zu Breslaw, dem dy malder doselbst zu Kittel durch eynen wechsel, mit dem hern apt und convent zu Camentz gehabt, zustehin an eynem, und Cristoff Reybenitz von Kittel am andern teylen, eynen handel sulcher malder halben mitenander gehabt und sich umb solcher ursachen willen umb sulche malder vertragen und dy sachen weyter an uns bracht. Also haben wir mit beyder teyle wost und wille sulche sache also beslossen und bestetiget: nemlich das dem gnanten hern Georgen Freyberg und seynen nachkomen techanden czum heligen Crewtz zu Breslaw von ytzlicher besehten huben gegebin sullen werden und gefallen yerlichen eyn furdung ganghafftiger myntze vor sulche malder zu des genannten Cristoff Reybnitz und Adam seynes sones lebetagen. Sonder nach yrer beyder tode sullen sich dy besiczer sulcher guter zum Kittel umb sulche malder mit dem techand zum heligen Crewtz zu Breslaw zu czeyten vertragen, wie sy mögen nach billichkeyt und der czeyt geleginheyt; das wir alles also bestetigen yn krafft dises brieffes, an den wir zu urkunde unser ingesiegel haben lossen hengen. Geschehen und geben czu Breslaw am tage sanct Katherine nach Cristi geburt MCCCCLXXX sexto. Dobey seyn gewest dy wolnamhafftige und erbare woltuchtigen: Heyncz Reybnicz unser marschalk, Peter Schoff von Maschkowicz, Hanns Nympsch von der Neyss, Hanns Adelspach und Hans Bock, unser getrawe und besundern lieben desir sachen geczewge.

Neisser Lagerbuch v. 1482-92 (III. 21. J.) fol. 120b.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.